JEAN MARIE LORET : Hitler-a fa a ni reng em?

Khawvel mihring piang tawhte zinga chanchin ngah leh lar ber pawl, Adolf Hitler-a chanchin hi Zofate zingah ngei pawh hian hre lo kan awm awm kher lo vang! A huaisen zia leh a nunrawn ziate pawh hai rual lovin kan hre ṭheuhvin a rinawm. Juda mi, nuai chuang zet mai a suat anih kha. A nunrawnna kha chu thudang ni ta se, a hun lai na na na kha chuan amah aia huaisen leh ropui kha an awm kher lo vang. Mahse a huaisen zia leh ral a beih dan lam ni lovin amah Hitler hian a nupui ni lo, midang lakah fa(sâwn) a lo nei rêng em tih lam hi i thlûrbing daih teh ang.

Pa pakhat, Jean Marie Loret, France ram-a mi chuan kum 1981 khan Hitler-a fapa a nih thu, a Autobiography “Your father‘s name was Hitler” tih lehkhabu a tlangzarhnaah a puang tlat mai. A chanchin ziahna lehkhabu a tihchhuah aṭanga kum 4-na ah, kum 67 mi niin a boral zui nghal a. Mipui hmaah Hitlera fa a nih thu lo puang tawh mah se, hetia amah ber a boral chhunzawm tak si avang hian court hmaah Hitler-a fa ngei a nih thu hi a prove hman ta lo a ni.

Mahse, Paris-a Loret-a lawyer, Francois Gilbault chuan a document-te leh a thlalak ṭhenkhatte chuan Hitler-a fa ngei a ni tih a prove theih thu a lo sawi a. Loret hi kum 1918 ah piangin, a pa chanchin hre lovin a seilian ve zel a. Tichuan tlêma a lo len deuh hnuin, a nu Charlotte Lobjoie chuan Loret chhungkuate hnenah adopt turin a pe ta a. 1950’s kum tir lam khan a nu hi a thih hma lawkin a fapa hnenah a inpuang ta a ni.

A nu hian Hitler-a nen affair an neih thu a hrilh a, tichuan chumi zan, June 1917-a thilthleng avang chuan amah a rawn pian thu a hrilh bawk. A nu chuan Fournes, Weppe, France-a an intawn thu leh chuta tang chuan inlaichinna thûk tak neiin hemi hnu lawk hian amah Jean-Marie a rawn pian tak thu a sawi.

Adolf Hitler, a fanu leh Reich Minister of Propaganda Joseph Goebbels, Kum 1933 a thlalak a ni. Heta a fanu hi a intihhlum hma lawka damdawi hmanga a chiu hlum kha a ni

Loret chu rawn seilian zelin, German ho chu a haw ṭan ta em em mai a. Kum 1939 khan German beihna ah a tel ve nghe nghe. Hemi ṭum hian 'Maginot line', Andre Maginot minister of war a nih laia German laka France humhimna tur a defence building pui zet mai a sak venghimtu pawlah chuan a tel ve nghe nghe a ni. Mahse German in France an lâk tak si-ah chuan French Resistance chu zawmin codename “Clement” hial pek a ni bawk.

Loret hian Hitler-a fapa a nîh thu hi rin har a ti em em mai a. A lehkhabu-a a ziah dan phei chuan, kum sawmhnih chhung chu rilru buai leh rinhlelnain a khah(khat) thu leh, a ṭhiante intihhlimna reng rengah pawh a tel ve ngai loh thu a sawi bawk. Kum 1970 chho vel khan, Loret hian a pa dik tak hriatchian tum hian evidence a lo zawng chiam tawh a. Tichuan, kum 1979 khan Lawyer Gibault nen intawngin, a nu leh Hitler-a chanchin hi a hrilh ta vek a. Adolf Hitler-a fapa a nih thu hi puanzar chi nge, ngawih bo pui mai chi ni ang tih vel ngaihtuahin a rilru a buai thei hle a ni.

French Magazine pakhat, Le point Magazine-a a lan dan chuan, Loret hian a pa chanchin hi a lo chhui ve nasa a ni awm e. University of Heidelberg-a Historian leh Genetecist-te bakah handwriting en thiam thlengin a lo râwn ve vek a. Hitler-a khan Loret-a nu hnenah hian an fapa chungchang hi tuma hnena a sawi lohna turin, a mamawh ang tawk tur pawisa a thawn ziah thu Le point Magazine chuan a tarlang bawk.

Loret-a evidence-ah te chuan German sipai lehkha pawimawh te a tel a. Hengte hian Lobjoie-i khan German Officer te hnen aṭangin envelop hmangin pawisa a dawng ṭhin ngei a ni tih a finfiah bawk a ni. Chu mai piah lamah, Hitler-a kutchhuak ngei lemziak Lobjoie-i In-ah hian hmuhchhuah a ni leh ta zel a. He lemziak ami hi amah Lobjoie-i ngei niin an sawi bawk.

Source : Click Here